Ons liefdesverhaal het nie in ’n koffiewinkel of op ’n romantiese aandete begin nie… maar langs ’n rugbyveld! My eerste “date” met JP was waar ek hom gaan ondersteun het. Hy was dalk nommer 4, 5 of 8 op die veld – maar hy het baie vinnig die nommer 1 posisie in my hart ingeneem.

Op 16 Julie 2021 het ons storie amptelik begin toe JP my gevra het om sy meisie te wees. Van daardie dag af het ons hand aan hand deur alles gestap – die mooi, die snaakse en selfs die uitdagende oomblikke. Net voor ons 3-jaar herdenking, op 2 Julie 2024, het JP my op die strand verras met die groot vraag… saam met my familie daar om dit saam met ons te vier. Dit was ’n ongelooflike spesiale en onvergeetlike oomblik wat ons altyd sal koester.

Sedertdien het ons al 2 knie-operasies oorleef, provinsies geskuif, ’n hondjie gekry (Luna – die ware baas van die huis ), ’n huis gekoop, groot mylpale bereik en ook saam deur moeilike tye gegaan. Elke ervaring het ons net nader aan mekaar gebring. Nou staan ons op die drumpel van ons volgende hoofstuk, met harte vol dankbaarheid en opgewondenheid. Ons kan nie wag om ons liefde te vier en ons pad vorentoe te begin saam met al ons hartsvriende en familie nie.

Hier begin ons vir altyd.